قصة علال مع مراتو طامو..

دخل علال للبيت عيَّان باش يتسنّت لعظامو
دخلات مراتو طامو
خلاتو حتى نعس وغرق فأحلامو
وبقات تقلب ليه فبزطاموا

**********

ناض شافها ڭال ليها اش كاديري يا هاد المرا
راه البزطام خاوي فيه غا فلوس الكرا
واش بغيتي تهزيهم و نخرجو برَّا
ونبداو عاوتاني فالجرا

**********

ڭالت ليه واعلال يهديك الله كاتشك فيا شحال من خطرة
كاتنسى الزواج وتنسى العشرة
أنا راني مرتك واش غادي نبغيلك المضرَّة

**********

راه غي حليت البزطام باش نهز درهم ولا ربعين
حيت بغيت نسيفط بنتك نسرين
للحانوت تجيب الدقيق والطحين
راك صايم وبغيت ندير ليك شي مسمن يكون بنين
ولكن نتا دغيا درتي العيب وخرجتي دوك العينين
وما بقيتيش تيق فيا من بعد گاع هاد السينين
إيوا دابا نوض شوف آش دير للفطور الله يرحم الوالدين

**********

هو حس بالغلطة وحماضت القضية
وقال ليها آمرتي طامو سمحي ليا
راه أنا لي شرفت وما بقيتش ندير النية
ولكن راكي مرتي وراني نبغيك غير نتيا
وراه ربي عارف هاد شي وشاهد عليا
إيوا دابا نوضي هزّي لي بغيتي وسيفطي الدرية
تجيب ليك لي خاص باش ديري شي شهيوة هاديك هيا
راني عارفك تبغيني واخا يوقع لي وقع ما تفرطيش فيا

---------------------

كلمات: الحاج بولحية مول القافية